نقدر نساعدك إزاي؟

يعني إيه شققي وبيعمل إيه؟

شققي تطبيق بيسهّل عليك وعلى زمايلك في الشقة حسابات الإيجار والفواتير والمصاريف المشتركة.

• بتسجّل أي مصروف في ثواني
• التطبيق بيقسّمه تلقائي وبيحسب مين عليه لمين
• تسجّل التسديد وتأكّده
• وفي آخر الشهر تقفل الشهر والكل متحاسب

المصاريف من غير حد، ومجانية.

أبدأ إزاي؟

أربع خطوات وإنت شغّال:

1. اعمل حساب (إيميل وباسورد، أو رقم موبايل، أو جوجل أو آبل)
2. اعمل شقة جديدة: اسم + نوع + عملة، وممكن تحط الإيجار الشهري
3. ادعُ زمايلك بلينك على واتساب أو بكود الشقة
4. دوس + مصروف وسجّل أول مصروف، والتطبيق يقسّمه لوحده

التطبيق مجاني؟

أيوه. تسجيل المصاريف والتقسيم والتسوية وقفل الشهر وكل الأساسيات مجانية ومن غير حد على عدد المصاريف. فيه شوية إعلانات بسيطة في أماكن محدودة.
لو عايز مميزات إضافية ومن غير إعلانات فيه شققي بلس (اشتراك اختياري).

إيه الفرق بين المجاني وبلس؟

المجاني: مصاريف من غير حد، تقسيم بكل الطرق، تسوية، قفل الشهر، تذكير يدوي، كارت المشاركة على واتساب، ووسيلة دفع واحدة تستلم عليها.
بلس يضيف:

• من غير إعلانات
• تذكير أوتوماتيك لزمايلك
• مصاريف بتتكرر
• تكرار مصروف بضغطة
• عدّة وسائل دفع
• تقرير الشهر PDF وإكسل
• رسوم بيانية لمصاريفك
• ألوان مختلفة للتطبيق

الأسعار: شهري 39 جنيه، سنوي 299 جنيه.

بيشتغل في أنهي دول وبأنهي عملات؟

التطبيق مبني لمصر أولاً، لكن تقدر تختار عملة كل شقة وقت ما تعملها:

• جنيه مصري (EGP)
• ريال سعودي (SAR)
• درهم إماراتي (AED)
• دولار (USD)
• يورو (EUR)

أرقام الموبايل المدعومة للتسجيل بالرقم هي أرقام مصر (01xxxxxxxxx). لو برا مصر سجّل بالإيميل أو جوجل أو آبل.

إزاي أغيّر لغة التطبيق أو شكل الأرقام؟

التطبيق بالعربي والإنجليزي. روح حسابي ثم اللغة والعملة، واختار اللغة وشكل الأرقام (عربي أو إنجليزي) والعملة الافتراضية للشقق الجديدة.

بيشتغل على أنهي موبايلات؟

على أندرويد وعلى الآيفون. حمّله من جوجل بلاي أو أب ستور، ولازم إنترنت شغّال عشان البيانات تتحدّث.

لازم زمايلي ينزّلوا التطبيق؟

لا. تقدر تضيف شخص من غير حساب (من قايمة الأعضاء) وإنت تدير مصاريفه وتسديداته وتذكيراته. ولما ينزّل التطبيق ويفتح لينك الدعوة بيختار اسمه ويكمّل على نفس حسابه.
التذكير للي ما نزّلوش التطبيق بيتبعت على واتساب بإيدك.

أقدر أستخدمه في رحلة أو شغل مش بس شقة؟

أيوه. وقت إنشاء المجموعة اختار النوع: بيت أو رحلة أو شغل أو غير ذلك. الفكرة واحدة: مصاريف مشتركة وتقسيم وتسوية. (في التطبيق بنسمّيها «شقة» في كل الحالات.)

الحسابات بتتحسب إزاي في الآخر؟

كل مصروف بيتقسّم بين الناس (بالتساوي أو بمبالغ أو نسب). التطبيق بيجمّع اللي دفعه كل واحد وبيطرح نصيبه، فيطلع لكل واحد إما له فلوس أو عليه فلوس. وبعدين بيقترح أقل عدد من التحويلات اللي تخلّي الكل متحاسب.

أعمل شقة جديدة إزاي؟

من الرئيسية أو من تبويب الشقق دوس + شقة جديدة، واكتب:

• اسم الشقة (مثلاً: شقة المعادي)
• النوع: بيت أو رحلة أو شغل أو غير ذلك
• العملة
• الإيجار الشهري (اختياري، وبيتضاف كل شهر تلقائي)

وبعدها ادعُ زمايلك.

أدعو زمايلي إزاي؟

افتح الشقة ودوس دعوة. تقدر:

• تبعت اللينك على واتساب (بيفتح التطبيق وهم ينضموا على طول)
• تشارك اللينك على أي تطبيق تاني
• تنسخ كود الشقة وتبعته

معايا لينك أو كود شقة، أنضم إزاي؟

لو معاك لينك افتحه والتطبيق هيوديك للانضمام. لو معاك كود: من تبويب الشقق دوس على القايمة (⋯) واختار انضم بكود أو رابط والصق الكود أو اللينك. لازم يكون عندك حساب أو تعمل واحد الأول.

ليه ظهرلي «تم إرسال الطلب»؟ مين بيقبلني؟

ساعات مسؤول الشقة لازم يقبل طلب الانضمام. الطلب بيظهر عنده في الأعضاء ثم طلبات انضمام وبيقدر يقبله أو يرفضه، وإنت بتتبلّغ بالنتيجة. لو اتأخر كلّمه يفتح التطبيق.

إزاي أضيف شخص من غير حساب؟

من الأعضاء دوس ضيف شخص من غير حساب واكتب اسمه. بتتحسب عليه مصاريف وتسديدات زي أي عضو، والمسؤول هو اللي يسجّل عنه. لما ينزّل التطبيق ويفتح لينك الدعوة يقدر يختار اسمه ويربط حسابه.

إيه صلاحيات مسؤول الشقة؟

المسؤول يقدر:

• يقبل طلبات الانضمام ويضيف أو يشيل أعضاء
• يخلّي عضو تاني مسؤول
• يقفل الشهر ويفتحه تاني
• يغيّر اسم الشقة أو يمسحها
• يسجّل تسديد بالنيابة عن حد (بيتحسب فوراً من غير تأكيد)

اللي عمل الشقة بيفضل مسؤول دايماً.

أخلّي زميلي مسؤول إزاي؟

من الأعضاء اضغط ضغطة طويلة على اسمه واختار خلّيه مسؤول. ولو عايز تشيل الصلاحية اختار شيله من المسؤولين. الصلاحية للأعضاء اللي نزّلوا التطبيق بس، مش للي من غير حساب.

عايز أسيب الشقة وأسلّمها لحد تاني، أعمل إيه؟

1. خلّي زميلك مسؤول من قايمة الأعضاء
2. سدّد حسابك لو عليك فلوس
3. من قايمة الشقة اختار اخرج من الشقة

الشقة هتكمل معاهم. ولازم يكون فيه مسؤول تاني قبل ما تخرج لو كنت المسؤول الوحيد.

أخرج من الشقة إزاي؟

من قايمة الشقة اختار اخرج من الشقة. شرطين:

• لازم تكون متحاسب (مفيش فلوس عليك أو لك)
• لو إنت المسؤول الوحيد لازم تخلّي حد تاني مسؤول الأول

مصاريفك القديمة بتفضل في السجل.

أشيل عضو من الشقة إزاي؟

المسؤول يضغط ضغطة طويلة على العضو من الأعضاء ويختار شيله من الشقة. لازم العضو يكون متحاسب الأول. المصاريف القديمة بتفضل في السجل، ويقدر يرجع تاني بكود الشقة.

أمسح الشقة كلها إزاي؟

المسؤول بس: من قايمة الشقة اختار امسح الشقة. الشقة بتختفي عند الكل وماحدش يقدر يضيف مصاريف أو تسديدات بعد كده. المصاريف القديمة بتتأرشف ومش بتتمسح نهائي.

أغيّر اسم الشقة؟

أيوه. افتح الشقة ثم إعدادات الشقة وغيّر الاسم واحفظ.

لو حد انضم في نص الشهر، هيدفع من الأول؟

مش بالضرورة من الأول. لو انضم والشهر مفتوح، المصاريف اللي اتقسّمت بالتساوي على كل الأعضاء ولسه ماحدش عدّل تقسيمها بتتعدّل تلقائي ويدخل فيها بالتساوي. التقسيمات المخصّصة (مبالغ أو نسب) ما بتتغيّرش، والشهور المقفولة كمان.
لو فتحت شهر مقفول بعد انضمام عضو جديد، التطبيق يسألك تضيفه للشهر ده ولا لأ.

فين الشقق القديمة اللي خرجت منها؟

من تبويب الشقق دوس القايمة (⋯) واختار الشقق السابقة. هتلاقي الشقق المؤرشفة للقراءة فقط.

أوقف إشعارات شقة معينة؟

أيوه. من قايمة الشقة اختار اكتم إشعارات الشقة. هتوصلك بس الطلبات المباشرة (زي تذكير ليك أو تسديد مستني تأكيدك)، ونشاط الشقة يفضل ظاهر في تبويب النشاط.

أضيف مصروف إزاي؟

دوس + مصروف (من الرئيسية أو من الشقة) واكتب:

1. المبلغ
2. المصروف ده على إيه (كهرباء، مياه، أكل...)
3. مين اللي دفع
4. التقسيم (بالتساوي أو غير كده)
5. الشهر

ودوس حفظ. التطبيق يحسب نصيب كل واحد، ولو غلطت ممكن تدوس تراجع.

إزاي أقسم مصروف بالتساوي؟ (مثال)

ده الوضع الافتراضي: اختار بالتساوي وعلّم على الناس اللي شاركت. مثال: فاتورة كهرباء 900 وإنتم 3 → كل واحد 300. لو شيلت علامة واحد من الاتنين التانيين، يبقى 450 لكل واحد من الاتنين، والتالت نصيبه صفر.

أقسم بمبالغ محددة لكل واحد؟

اختار مبالغ واكتب نصيب كل واحد. لازم المجموع يساوي المبلغ الكلي، والتطبيق يوريك الباقي أو الزيادة. مثال: مشتريات 1000: علي 500، عمر 300، سارة 200.

أقسم بالنسبة المئوية؟

اختار نسبة واكتب نسبة كل واحد، ولازم المجموع 100%. مثال: إيجار 6000 بنسبة 50/30/20 → 3000 و1800 و1200. مفيد لو غرفة أكبر من غرفة.

ينفع أخلط أكتر من طريقة في نفس المصروف؟

أيوه. لكل شخص اختار بالتساوي أو مبلغ أو %. المبالغ والنسب بتتاخد الأول، والباقي بيتقسم بالتساوي على اللي اخترت لهم «بالتساوي». مثال: مصروف 1000، عمر مبلغ 400، علي 20% (200)، والباقي 400 يتقسم على سارة ومنى = 200 لكل واحدة.

مصروف مش بيخص كل الشقة، أعمل إيه؟

وقت اختيار التقسيم شيل العلامة من اللي مش مشارك. نصيبه هيبقى صفر وما يتحسبش عليه حاجة.

اتنين دفعوا في نفس المصروف، أسجّل إزاي؟

في خانة دفعه اختار أكتر من شخص واكتب كل واحد دفع كام. المجموع لازم يساوي المبلغ. التطبيق يحسب الفرق بين اللي دفعه كل واحد ونصيبه.

واحد دفع أكتر من نصيبه، الحسابات بتتعدل إزاي؟

سجّل المصروف واختار مين اللي دفع. اللي دفع أكتر من نصيبه يظهر له فلوس، واللي دفع أقل يظهر عليه، وبعدين تقدروا تسدّدوا بأقل عدد تحويلات.

أعدّل مصروف اتسجّل؟

افتح المصروف ودوس تعديل المصروف. تقدر تغيّر الاسم ومين دفع والتقسيم. لو التقسيم مخصّص أو الدافعين أكتر من واحد، المبلغ نفسه ما يتغيّرش: امسح المصروف وسجّله من جديد. ولو الشهر مقفول لازم المسؤول يفتحه الأول. أي عضو في الشقة يقدر يعدّل، وكل تعديل بيظهر في النشاط.

أمسح مصروف وأرجّعه لو غلطت؟

افتح المصروف ودوس امسح المصروف. حصة كل واحد بترجع زي ما كانت. تقدر ترجّعه بزر تراجع خلال حوالي ١٠ ثواني. بعد كده لازم تسجّله من جديد. المسح بيظهر في النشاط للكل.

ازاي أخلّي مصروف يتكرر كل شهر؟

افتح المصروف واختار خلّيه يتكرر كل شهر: اختار التكرار (كل شهر أو أسبوع أو ٣ شهور)، واليوم، والمبلغ (ثابت أو يفكّرك تدخله)، ولحد امتى. بيتسجّل لوحده ويتقسم بالتساوي على أعضاء الشقة وقتها.
الإيجار ممكن يتكرر مجاناً، أما باقي المصاريف المتكررة فهي ضمن بلس.

أنسخ مصروف للشهر الجاي بضغطة؟

أيوه، من خصائص بلس. افتح المصروف واختار كرّره للشهر الجاي (أو أي شهر تاني). بيتنسخ بنفس الاسم والمبلغ والتقسيم ومين دفع. لو الشهر المقصود مقفول اختار شهر تاني.

أضيف صورة فاتورة للمصروف؟

أيوه. افتح المصروف واختار أضف صورة فاتورة وصوّر بالكاميرا أو اختار من الصور. الصيغ المسموحة JPG وPNG وWebP وحد أقصى ٥ ميجا. الصورة يشوفها أعضاء الشقة بس. التطبيق مش بيقرأ الفاتورة تلقائي، إنت اللي بتكتب المبلغ.

إيه تصنيفات المصاريف؟

الإيجار، الكهرباء، المياه، الغاز، الإنترنت، البقالة، النظافة، مستلزمات البيت، الأكل، المواصلات، وغير ذلك. اختار الأقرب وقت إضافة المصروف.

ينفع مصاريف بعملات مختلفة في نفس الشقة؟

لا. كل شقة بعملة واحدة بتختارها وقت إنشائها. لو محتاج عملة تانية اعمل شقة تانية بالعملة دي.

سجّلت مصروف في شهر غلط، أعمل إيه؟

افتح المصروف وعدّل الشهر/التاريخ لو الشهر مفتوح. ولو الشهر المقصود مقفول، المسؤول يفتحه الأول، أو أضف المصروف للشهر الجاي (التطبيق بيعرض لك الاختيارين).

مين يقدر يعدّل أو يمسح المصاريف؟

أي عضو في الشقة يقدر يعدّل أو يمسح مصروف في شهر مفتوح، وكل تعديل أو مسح بيظهر في النشاط لكل الأعضاء. الشهور المقفولة محدش يقدر يعدّل فيها غير بعد ما المسؤول يفتحها.

أضيف الإيجار الشهري إزاي؟

وقت إنشاء الشقة اكتب الإيجار الشهري وهيتسجّل كل شهر تلقائي. أو سجّله كمصروف عادي واجعله يتكرر. ولو الإيجار متفاوت بين الغرف استخدم التقسيم بالنسبة.

يعني إيه شهر مفتوح وشهر مقفول؟

الشهر المفتوح بتضيف فيه مصاريف وتعدّل براحتك. الشهر المقفول بيتحفظ كملخص ومحدش يقدر يعدّل مصاريفه، وبتلاقيه في تبويب مغلقة. التسديدات لسه ممكن تتسجّل على شهر مقفول.

أقفل الشهر إزاي؟

افتح الشهر من الشقة ودوس اقفل الشهر (المسؤول بس). هيظهرلك أقل عدد تحويلات تخلّي الكل متحاسب، وتختار تقفل وتبعت تذكيرات أو تقفل من غير تذكيرات. الشهر المقفول بيتحفظ في «مغلقة»، والمصاريف المتكررة بتتضاف للشهر الجاي تلقائي. مينفعش تقفل شهر لسه ما بدأش.

لقيت غلطة بعد ما قفلت الشهر، أفتحه تاني؟

أيوه. المسؤول يفتح الشهر المقفول ويدوس افتح الشهر تاني. بيتشال الملخص المجمّد وتقدر تعدّل المصاريف تاني. بعد التعديل اقفله من جديد.

يعني إيه «له» و«عليه»؟

له = لسه ليه فلوس عند زمايلك (دفع أكتر من نصيبه). عليه = لسه عليه يدفع لزمايله. اللون الأخضر للي ليه، والأحمر/البرتقالي للي عليه. لما الاتنين يتصفّروا بتظهر متحاسب.

أسدّد لزميلي إزاي؟

من الرئيسية أو الشقة دوس ادفع (أو سدّد) جنب اسم الشخص، واختار:

1. المبلغ كله أو جزء منه
2. طريقة الدفع: كاش أو إنستاباي أو محفظة
3. دوس سجّلت إني دفعت

التطبيق بيوريك بيانات الاستلام اللي هو ضافها (إنستاباي أو رقم محفظة). التسجيل بيبعت إشعار للمستلم عشان يأكّد إنه استلم.

أقدر أدفع جزء من اللي عليّا؟

أيوه. اختار جزء منه واكتب المبلغ اللي دفعته (لحد اللي عليك). الباقي يفضل مكتوب لحد ما تسدّده.

يعني إيه «مستني التأكيد»؟ ومين بيأكّد؟

لما إنت تسجّل إنك دفعت، المستلم بيوصله إشعار ويقدر يدوس أيوه، استلمت أو لسه ماوصلش. التسديد بيتحسب على طول (عشان دينك يقل)، ولو المستلم قال «لسه ماوصلش» بيتلغي. بعد ما المستلم يأكّد التسديد يبقى نهائي. لو المستلم من غير حساب أو المسؤول هو اللي سجّل، بيتحسب فوراً من غير تأكيد.

إيه الفرق بين «تسوية الشهر ده» و«تسوية إجمالي رصيد الشقة»؟

• تسوية الشهر ده: الدفعة بتتحسب على الشهر ده بس (حتى لو مقفول)، وبتتحرك أرقامه هو لوحده.
• تسوية إجمالي رصيد الشقة: الدفعة على إجمالي اللي عليك في الشقة كلها، وبتتوزع على الشهور من الأقدم للأحدث.

مثال: عمر عليه لعلي 300 في يناير و200 في فبراير. لو دفع 400 على إجمالي الشقة: يناير يتسدّد 300 وفبراير يتسدّد 100 ويفضل 100.

الدفعة بتتوزع على الشهور إزاي؟

في «إجمالي الشقة» التطبيق بيبدأ من أقدم شهر: يسدّد من الشهر ده أقل قيمة بين اللي عليك واللي للمستلم في الشهر ده، وبعدين ينتقل للأحدث. لو دفعت أكتر من اللي عليك، الزيادة بتتسجّل في آخر شهر اتوزّع عليه. النتيجة إن مجموع التوزيع = اللي دفعته بالظبط.

سجّلت تسديد بالغلط، ألغيه إزاي؟

افتح تبويب المدفوعات في الشهر (أو تفاصيل التسديد) وامسح التسديد الغلط. الرصيد بيرجع زي ما كان وبيظهر في النشاط. وبعدين سجّل التسديد الصح. ولو المستلم أكّده خلاص، المسح يتم من قايمة التسديدات برضو، فلازم تتفقوا عليه.

أسجّل تسديد بالنيابة عن زميل؟

المسؤول يقدر من الأعضاء: اضغط ضغطة طويلة على العضو واختار سجّل تسوية (أو «سجّل إنه دفعلك»). بيتحسب فوراً ومحدش محتاج يأكّد. مفيد للي من غير حساب.

أضيف طريقة استلام الفلوس (إنستاباي/محفظة/بنك)؟

روح حسابي ثم طرق الدفع ودوس + أضف طريقة دفع. تقدر تضيف:

• إنستاباي (عنوان name@bank)
• محفظة موبايل (رقم 01xxxxxxxxx)
• حساب بنكي (IBAN أو رقم الحساب + اسم البنك + اسم صاحب الحساب)
• كاش

أول وسيلة دفع مجانية، وإضافة وسيلة تانية وأكتر (لحد ٥) ضمن بلس. تختار واحدة أساسية، ولو كنت ضايف أكتر من وسيلة قبل كده بتفضل زي ما هي وتقدر تعدّلها أو تمسحها. زمايلك بيشوفوها وقت ما يدفعولك وبتظهر في التذكيرات والتقارير.

أفكّر زميلي إنه عليه فلوس إزاي؟

دوس ذكّره جنب اسمه، واختار النبرة (ودّية، رسمية، ضاحكة، مختصرة) وابعت على واتساب أو كإشعار جوه التطبيق بس. التذكير مرة واحدة كل ٢٤ ساعة لكل شخص. اللي من غير حساب التذكير ليه بيتبعت على واتساب.

ينفع التذكير يتبعت لوحده؟

أيوه، من بلس. من قايمة الشقة اختار تذكيرات أوتوماتيك وفعّلها، واختار كل ٣ أيام أو أسبوع أو أسبوعين والنبرة. بتتبعت للي عليهم فلوس ليك بس، وبتقف لوحدها أول ما الشخص يدفع. للأعضاء اللي نازلين التطبيق كإشعار؛ اللي من غير حساب بيتعلّموا في النشاط بس.

ليه التطبيق بيقولي أدفع لشخص مش اللي دفع عني؟

التطبيق بيبسّط الديون: بدل ما كل واحد يدفع لكل واحد، بيحسب أقل عدد تحويلات تخلّي الكل متحاسب. فممكن تدفع لشخص تاني غير اللي دفع المصروف، والنتيجة النهائية للكل واحدة.

لما الكل يتسدّد بيحصل إيه؟

بتظهر علامة متحاسب والكل متسدّد في الشقة، وبيظهر في النشاط إن الشقة اتسدّدت بالكامل. تقدر تكمل تضيف مصاريف جديدة أو تقفل الشهر.

أبعت ملخص الشهر لزمايلي على واتساب؟

أيوه ومجاناً. من قايمة الشهر اختار شارك الملخص على واتساب، والتطبيق يطلّع كارت صورة فيه مين يدفع لمين ولكل شخص كام. وكمان فيه كارت إيصال للتسديد وكارت للمصروف.

إيه هو شققي بلس وإيه اللي بيضيفه؟

بلس اشتراك اختياري بيشيل الإعلانات وبيفتح مميزات توفّر عليك وقت:

• من غير إعلانات خالص
• تذكير أوتوماتيك لزمايلك
• مصاريف بتتكرر (إنترنت، نضافة، جمعية...)
• تكرار مصروف للشهر الجاي بضغطة
• عدّة وسائل دفع تستلم عليها (المجاني وسيلة واحدة)
• تقرير الشهر PDF وإكسل
• رسوم بيانية لمصاريفك
• ألوان إضافية للتطبيق

الأساسيات (تسجيل وتقسيم وتسوية وقفل الشهر) تفضل مجانية.

الاشتراك بكام؟ وفيه تجربة مجانية؟

• شهري: 39 جنيه في الشهر (تقدر تلغي في أي وقت)
• سنوي: 299 جنيه في السنة، وبيبدأ بـ 7 أيام مجاناً. هنفكّرك قبل أول خصم بيومين
• للشقة كلها: 499 جنيه في السنة، انت بتدفع وكل أعضاء الشقة ياخدوا بلس (مش متاح على الآيفون)

السعر النهائي بتشوفه في جوجل بلاي أو أب ستور وقت الاشتراك.

إيه خطة «بلس للشقة كلها»؟

انت بتدفع 499 جنيه في السنة، وكل أعضاء الشقة دي ياخدوا بلس من غير ما حد فيهم يشترك لوحده. لو عندك بلس شخصي تقدر تترقّى للخطة دي وتدفع الفرق بس. الخطة دي متاحة على أندرويد والويب، مش على الآيفون.

بالظبط إيه اللي بيفتحه بلس؟

تمن حاجات:

1. من غير إعلانات
2. تذكير أوتوماتيك كل ٣ أيام أو أسبوع أو أسبوعين
3. مصاريف بتتكرر (غير الإيجار اللي بيتكرر مجاناً)
4. تكرار المصروف للشهر الجاي أو أي شهر
5. عدّة وسائل دفع: المجاني وسيلة واحدة، وبلس لحد ٥
6. تقرير الشهر PDF وإكسل
7. رسوم بيانية: حسب التصنيف وحسب الشخص وشهر بشهر
8. ألوان التطبيق (محيط، غروب، برقوق، غابة غير الأخضر الأساسي)

أدفع الاشتراك بإيه؟

• جوجل بلاي على أندرويد
• أب ستور على الآيفون
• على أندرويد والويب ممكن كمان الدفع المباشر عن طريق Paymob (كارت بنكي أو محفظة موبايل أو فوري) لما يكون متاح

الدفع بـ Paymob مش موجود جوه تطبيق الآيفون. بيانات الكارت بتروح لـ Paymob مباشرة ومش بنحتفظ بيها.

دفعت بفوري أو محفظة، هل بيتجدد لوحده؟

لا. الدفع بالمحفظة أو فوري مش بيتجدد أوتوماتيك. هنفكّرك قبل ما ينتهي عشان تجدّد. مع فوري بتاخد رقم مرجعي وتدفعه في أي فرع أو ماكينة (+ رسوم فوري)، وبلس بيشتغل لوحده خلال دقايق.

ألغي الاشتراك إزاي؟

الإلغاء بيتم من المتجر اللي اشتركت منه:

• جوجل بلاي: افتح حسابي ثم بلس ودوس إلغاء من جوجل بلاي (أو من جوجل بلاي ثم الاشتراكات)
• أب ستور: من إعدادات الآيفون ثم اسمك ثم الاشتراكات

بعد الإلغاء بلس يفضل شغّال لحد آخر المدة المدفوعة وكل بياناتك تفضل زي ما هي. لازم تلغي قبل التجديد بـ ٢٤ ساعة على الأقل.

عايز أسترجع فلوسي، أعمل إيه؟

الاسترداد بيتم من المتجر:

• جوجل بلاي: من صفحة الاشتراك/الطلب في جوجل بلاي واطلب استرداد حسب سياستهم
• أب ستور: من reportaproblem.apple.com
• Paymob (كارت/محفظة/فوري): كلّمنا على support@shoqqy.app واكتب رقم العملية

بعد الاسترداد بلس بيتوقف.

غيّرت الموبايل أو نزّلت التطبيق تاني وبلس مش ظاهر؟

سجّل دخول بنفس الحساب، وبعدين من حسابي ثم بلس دوس استرجاع مشترياتي. لازم تكون داخل بنفس حساب جوجل أو أبل اللي اشتركت بيه. لو رسالة «ملقيناش اشتراك»، يبقى الاشتراك على حساب متجر تاني.

عندي كوبون أو خصم من النقاط، أستخدمه فين؟

كوبون النقاط بيتطبق أوتوماتيك في صفحة الاشتراك وبتشوف «تم تطبيق الكوبون». الخصومات بالنسبة (٢٠٪ و٥٠٪ على السنوي) متاحة على أندرويد والويب، ومكافآت الأيام المجانية (شهر أو سنة) متاحة على كل المنصات بما فيها الآيفون. الكوبون صالح مدة محدودة ولمرة واحدة.

لسه بيتخصم مني بعد ما لغيت؟

افحص الآتي:

• الإلغاء لازم يكون قبل التجديد بـ ٢٤ ساعة
• مسح التطبيق أو مسح حسابك في شققي مش بيلغي الاشتراك، لازم تلغيه من المتجر
• يمكن عندك اشتراك على حساب متجر تاني (جوجل أو آبل)
• في جوجل بلاي/أب ستور شوف الاشتراكات النشطة

لو لسه فيه مشكلة ابعتلنا على support@shoqqy.app مع لقطة شاشة من الاشتراك.

دفعت ومفيش بلس اتفعّل؟

استنى دقيقتين، التفعيل بيتأكد من المتجر. لو لسه:

1. اقفل التطبيق وافتحه
2. حسابي ثم بلس ثم استرجاع مشترياتي
3. اتأكد إنك داخل بنفس الحساب

لو الدفع بفوري ممكن ياخد دقايق. ولو الرسالة «الاشتراك مربوط بحساب تاني» يبقى حساب المتجر ده مستخدم مع حساب شققي تاني. لسه؟ كلّمنا على support@shoqqy.app.

لو بلس خلص أو لغيته، هيحصل إيه في بياناتي؟

كل بياناتك تفضل زي ما هي. بس المميزات المدفوعة بتتقفل: التذكير الأوتوماتيك وتكرار المصاريف (ما عدا الإيجار) وتقرير الشهر والرسوم وتكرار المصروف، والإعلانات ترجع. المصاريف المتكررة القديمة تقدر تشوفها وتوقفها.

أغيّر الخطة من شهري لسنوي أو العكس؟

افتح حسابي ثم بلس ثم تغيير الخطة واختار الخطة. التغيير بيتم في المتجر زي أي اشتراك، وجوجل أو أبل هيوضّحوا التكلفة والتجديد.

فين الإعلانات وإزاي أشيلها؟

النسخة المجانية فيها إعلانات بسيطة في أماكن محدودة. اشتراك بلس بيشيلها كلها. ملحوظة: إحنا مابنبعتش إعلانات في الإشعارات أبداً.

«ادعُ واكسب» بتشتغل إزاي؟

من حسابي ثم ادعُ أصحابك هتلاقي لينكك الشخصي. ابعته لصاحبك:

1. صاحبك يسجّل ويأكّد رقمه من لينكك → هو ياخد 50 نقطة و14 يوم بلس مجاناً، وإنت تاخد 50 نقطة
2. يضيف أول مصروف له في شقة فيها عضوين على الأقل → إنت تاخد 50 نقطة
3. يشترك في بلس (مش تجربة) → إنت تاخد 200 نقطة

وبعدين بتبدّل نقطك بخصم أو بلس مجاني.

النقاط بتتضاف إمتى؟

النقاط بتوصل على مراحل بحسب اللي بيعمله صاحبك: لما يسجّل ويأكّد رقمه، ولما يسجّل أول مصروف في شقة فيها عضوين على الأقل، ولما يشترك فعلاً في بلس. شوف أصحابي ونقاطي عشان تتابع كل واحد وصل لأنهي مرحلة. النقاط المعلّقة بتتحسب أول ما صاحبك يكمّل الخطوة.

أبدّل نقطي بإيه؟

من حسابي ثم ادعُ أصحابك ثم بدّل نقطك:

• خصم ٢٠٪ على بلس: 200 نقطة
• شهر بلس مجاناً: 350 نقطة
• خصم ٥٠٪ على السنوي: 600 نقطة
• سنة بلس مجاناً: 4000 نقطة

بتاخد كوبون صالح مدة محدودة بيتطبق أوتوماتيك في صفحة الاشتراك. الخصومات بالنسبة مش متاحة على الآيفون، والأيام المجانية متاحة للكل.

صاحبي هيستفيد إيه لما يسجّل من لينكي؟

بياخد 50 نقطة و14 يوم بلس مجاناً بدل أيام التجربة العادية. الهدية بتتضاف بعد ما يأكّد رقم موبايله.

صاحبي سجّل من لينكي ومخدش الهدية، ليه؟

الشروط:

• الحساب جديد (خلال أول 14 يوم)
• رقم الموبايل متأكّد بكود
• كل رقم وكل موبايل ياخد هدية مرة واحدة
• مينفعش يستخدم كودك الشخصي ولا رقمك ولا موبايلك

لو الشروط اتحققت وما اتضافتش كلّمنا على support@shoqqy.app.

النقاط بتنتهي؟

أيوه. النقاط بتفضل معاك 12 شهر وبعدين بتنتهي، فاستخدمها قبل كده. بتشوف نشاط النقاط في أصحابي ونقاطي.

ليه نقاطي «معلّقة» أو متأخرة؟

ممكن لسببين: إما صاحبك لسه ما كمّلش الخطوة (تسجيل أو أول مصروف أو اشتراك)، أو النظام لقى حاجة غير معتادة (زي موبايل مشترك) فبتتراجع يدوي قبل ما تتضاف أو تتلغي. لو من فترة طويلة كلّمنا على support@shoqqy.app.

فيه حد أقصى للدعوات؟

أيوه، الحد 20 دعوة محتسبة في الشهر لكل شخص. لو وصلت الحد صاحبك لسه ياخد هديته، لكن نقاطك الجديدة تكمل الشهر اللي بعده.

إيه القواعد ضد التلاعب في الدعوات؟

عشان النقاط تفضل عادلة:

• الدعوة لازم تبقى لشخص حقيقي جديد بيأكّد رقمه
• مينفعش تدعو نفسك أو تستخدم نفس الرقم أو نفس الموبايل
• كل رقم وموبايل ياخد هدية مرة
• أول مصروف لازم يتسجّل في شقة فيها عضوين على الأقل
• لو ظهر نمط غريب (كذا حساب من نفس الجهاز أو في وقت قصير) النقاط بتتراجع قبل ما تتضاف، وممكن تتلغي

فين لينك الدعوة بتاعي؟

حسابي ثم ادعُ أصحابك: هتلاقي لينكك الشخصي مع أزرار واتساب ومشاركة ونسخ.

أطلّع تقرير الشهر PDF أو إكسل إزاي؟

من قايمة الشهر اختار صدّر التقرير، واختار PDF أو إكسل، وبعدين حفظ أو ابعت على واتساب. التقرير فيه كل المصاريف والأرصدة حسب التصنيف وحسب الشخص، وجاهز تبعته لصاحب العقار أو لزمايلك. الميزة دي ضمن بلس.

التقرير فيه إيه بالظبط؟

اسم الشقة والشهر والمسؤول وتاريخ الإنشاء، إجمالي المصروف وعدد المصاريف والأعضاء، جدول بكل المصاريف (التاريخ، التصنيف، مين دفع، المبلغ)، ونصيب كل عضو (دفع كام، نصيبه، اللي اتسدّد، الصافي)، وبيانات الدفع الأساسية. الإكسل فيه صفحات الملخص والمصاريف والأنصبة.

التقرير بأنهي لغة؟

التقرير بيتطلّع بلغة التطبيق اللي إنت مختارها (عربي أو إنجليزي). غيّر اللغة من حسابي ثم اللغة والعملة قبل ما تصدّر.

أبعت كارت على واتساب إزاي؟

ده مجاني. من الشهر اختار شارك الملخص على واتساب، أو من تسديد اختار ابعت إيصال على واتساب، أو من المصروف شارك كصورة. بيتحوّل لصورة جاهزة تبعتها لجروب الشقة أو لأي حد. لو واتساب مش منزّل اختار تطبيق تاني.

أنزّل نسخة من بياناتي؟

أيوه. حسابي ثم الشروط والخصوصية ثم نزّل نسخة من بياناتي. بتحصل على ملف ببياناتك (الملف الشخصي، شققك، مصاريفك، تسديداتك). مسموح مرة كل ساعة. الملف مافيهوش كلمة سر ولا بيانات اتصال أعضاء تانيين.

بسجّل دخول بإيه؟

أربع طرق: إيميل وكلمة سر، رقم موبايل بكود يوصلك، جوجل، وآبل. تقدر تربط أكتر من طريقة بحسابك الواحد من حسابي ثم تعديل الحساب ثم طرق الدخول.

نسيت كلمة السر، أعمل إيه؟

من شاشة الدخول دوس نسيت كلمة السر؟ واكتب الإيميل اللي سجّلت بيه. هيوصلك كود من ٦ أرقام، اكتبه، وبعدين اختار كلمة سر جديدة (٨ حروف على الأقل وفيها رقم). لو ما وصلش الكود شوف السبام وجرّب «إعادة الإرسال».

أغيّر كلمة السر إزاي؟

حسابي ثم تغيير كلمة السر، اكتب الحالية والجديدة وأكّدها. هتفضل داخل على الموبايل ده، ويتسجّل خروجك من الأجهزة التانية. الخيار ده مش ظاهر لو بتدخل بجوجل أو آبل بس (اعمل كلمة سر الأول من طرق الدخول).

أغيّر رقم موبايلي أو أضيف رقم؟

حسابي ثم تعديل الحساب (أو «أضف رقم موبايلك»)، اكتب الرقم (01xxxxxxxxx) واضغط ابعت الكود وأكّده. لو الرقم تابع لحساب تاني هتظهر رسالة. الرقم بيخلّي زمايلك يلاقوك والتذكيرات توصلك.

أغيّر اسمي أو إيميلي أو صورتي؟

حسابي ثم تعديل الحساب: تقدر تغيّر الاسم ولون الصورة أو ترفع صورة. لو بتدخل بجوجل أو آبل الإيميل بيكون مربوط بيهم ومينفعش يتغيّر من هنا.

أربط جوجل أو آبل بحسابي؟

حسابي ثم تعديل الحساب ثم طرق الدخول ودوس ربط جنب جوجل أو آبل. بياناتك وشققك تفضل زي ما هي. تقدر تفك الربط في أي وقت طالما فيه طريقة دخول تانية. لو الإيميل بتاع جوجل عليه حساب تاني هنسألك تدمج الحسابين ولا لأ.

إزاي أتأكد إن محدش غيري داخل على حسابي؟

غيّر كلمة السر من حسابي ثم تغيير كلمة السر: ده بيسجّل خروجك من كل الأجهزة التانية. ولو الدخول بجوجل أو آبل غيّر كلمة سر حسابهم من عندهم. وانت تقدر تعمل تسجيل خروج من الموبايل الحالي أي وقت.

أمسح حسابي إزاي؟ وإيه اللي بيتمسح؟

حسابي ثم امسح حسابي، واكتب كلمة التأكيد (امسح) وأكّد بكلمة السر أو كود لرقمك. هنمسح بياناتك الشخصية خلال ٣٠ يوم: الاسم والإيميل والرقم والصورة وطرق الدخول وطرق الدفع والإشعارات. المصاريف في الشقق المشتركة بتفضل باسم «عضو سابق» عشان حسابات زمايلك تفضل صح، وأي مبلغ عليك بيفضل ظاهر ليهم. لو إنت مسؤول، بنرقّي أقدم عضو تاني. اشتراك بلس مش بيتلغي لوحده، الغيه من المتجر.

بياناتي مشفّرة وآمنة؟

كل الاتصال بين التطبيق والسيرفر مشفّر (HTTPS). البيانات الشخصية الحساسة (زي الموبايل والإيميل ونص رسائل الدعم) بتتخزّن مشفّرة، وكلمات السر بتتخزّن بشكل مش ممكن يتفك (مش بنعرفها). ومحدش بيشوف مصاريفك غير أعضاء شقتك.

إيه البيانات اللي بتجمعوها؟ وبتستخدموها في إيه؟

بنجمع اسمك ورقمك أو إيميلك وشققك والمصاريف والتسديدات اللي بتسجّلها، عشان نحسب نصيب كل واحد ونبعتلك تذكيرات ونحمي حسابك. مابنبيعش بياناتك ومابنقرأش جهات اتصالك من غير إذنك. فيه شوية إعلانات بسيطة وإحصائيات استخدام لتحسين التطبيق. تقدر تقرا الشروط والخصوصية كاملة من الحساب.

مين يقدر يشوف مصاريفي؟

أعضاء الشقة اللي إنت فيها بس. محدش برا الشقة بيشوف أي حاجة. صور الفواتير كمان بتظهر لأعضاء الشقة بس.

أسجّل خروج إزاي؟

حسابي ثم تسجيل الخروج (في آخر القايمة). بياناتك بتفضل محفوظة على حسابك وتقدر تدخل تاني في أي وقت.

إيه أنواع الإشعارات اللي بتوصلني؟

• مصروف جديد في شقة ليك فيه نصيب
• تذكير بالدفع من زميل (أو تذكير أوتوماتيك لو عنده بلس)
• تسديد مستني تأكيدك، ونتيجة تأكيد تسديدك
• طلب انضمام للشقة (للمسؤول) وعضو جديد
• قفل الشهر
• ملخص أسبوعي كل جمعة: اللي ليك واللي عليك

ومابنبعتش إعلانات في الإشعارات أبداً.

أتحكم في الإشعارات إزاي؟

حسابي ثم الإشعارات وفعّل أو أوقف: المصروف الجديد، تذكيرات الدفع، الملخص الأسبوعي. ولو عايز توقف شقة معينة اختار اكتم إشعارات الشقة من قايمتها. وكل الإشعارات بتتجمّع في شاشة الإشعارات وتقدر تعلّمها «مقروءة».

الإشعارات مش بتوصلني على أندرويد؟

جرّب بالترتيب:

1. إعدادات الموبايل ثم التطبيقات ثم شققي ثم الإشعارات: تأكد إنها شغّالة (وقنوات الإشعارات كلها شغّالة)
2. أندرويد ١٣ وأحدث: اسمح بإذن الإشعارات لما التطبيق يطلبه، أو فعّله من نفس الصفحة
3. البطارية: اختار «بدون قيود» أو شيل شققي من توفير الطاقة/Optimization (بعض الموبايلات زي شاومي وأوبو وسامسونج بتقفل التطبيقات في الخلفية)
4. اتأكد إن «عدم الإزعاج» مقفول
5. اتأكد إن الإشعارات شغّالة في حسابي ثم الإشعارات ومش كاتم الشقة

الإشعارات مش بتوصلني على الآيفون؟

1. الإعدادات ثم الإشعارات ثم شققي وفعّل السماح بالإشعارات
2. اتأكد إن التنبيهات والأصوات شغّالة وإن وضع التركيز / عدم الإزعاج مش مانعها
3. تأكد إن الإنترنت شغّال
4. اتأكد من حسابي ثم الإشعارات ومن إن الشقة مش مكتومة

لو لسه، سجّل خروج وادخل تاني.

ليه زميلي مابيجيلوش التذكير؟

التذكير كإشعار بيوصل بس لعضو نازل التطبيق ومفعّل الإشعارات. الشخص اللي من غير حساب مفيش إشعار ليه، فابعت له التذكير على واتساب من نفس الشاشة. والتذكير مرة كل ٢٤ ساعة لكل شخص.

إيه شاشة «النشاط»؟

بتعرض كل اللي حصل في شققك: مصروف اتضاف أو اتعدّل أو اتمسح، تسديد، عضو جديد، قفل شهر. تقدر تفلتر على محتاج رد أو مدفوعات أو مصاريف. أي تسديد مستني تأكيدك بتلاقيه هنا وتدوس تأكيد.

إيه الملخص الأسبوعي؟

إشعار كل جمعة بيقولك اللي ليك واللي عليك. تقدر توقفه من حسابي ثم الإشعارات.

مش قادر أسجّل دخول

جرّب:

• اتأكد من الإيميل أو الرقم واكتب كلمة السر بدون مسافات
• استخدم نفس الطريقة اللي سجّلت بيها (إيميل، رقم، جوجل أو آبل)
• بعد ٥ محاولات غلط الحساب بيتقفل مؤقتاً ١٥ دقيقة، استنى وجرّب تاني
• دوس نسيت كلمة السر؟ لو نسيتها
• اتأكد من الإنترنت
• لو الرسالة «الحساب متوقّف» كلّم الدعم على support@shoqqy.app

كود التأكيد (OTP) مش بيوصل

• تأكد من الرقم (01xxxxxxxxx) وإن الموبايل فيه شبكة
• استنى دقيقة ودوس إعادة إرسال الكود (فيه عدّاد بين كل مرة)
• مرات كتيرة في فترة قصيرة بتتحظر مؤقتاً، استنى شوية
• لو الإيميل: شوف السبام
• الكود صالح لدقايق محدودة، اطلب جديد لو انتهى
• جرّب طريقة دخول تانية (إيميل أو جوجل أو آبل)

لو لسه كلّمنا على support@shoqqy.app.

ظهرتلي «انتهت الجلسة»

ده طبيعي بعد فترة أو بعد تغيير كلمة السر من جهاز تاني. سجّل دخول تاني وبياناتك كلها زي ما هي.

التطبيق بيطلب مني أحدّث

لما نصدر نسخة فيها تغييرات أمان أو حسابات ضرورية، النسخ القديمة بتتقفل ويطلب منك «تحديث مطلوب». دوس تحديث وهيودّيك لجوجل بلاي أو أب ستور. بياناتك مش بتتأثر. أحياناً بيظهر تحديث اختياري تقدر تأجّله.

الأرقام مش مظبوطة، إجمالي الشهر مش زي إجمالي الشقة

الأسباب الشائعة:

• رصيد الشقة إجمالي كل الشهور، أما شاشة الشهر فبتعرض الشهر ده بس
• تسديد على شهر معيّن بيحرّك أرقام الشهر ده بس، وتسديد إجمالي الشقة بيتوزع من الأقدم للأحدث
• التسديد المستني تأكيد بيتحسب على طول، ولو اترفض بيتلغي
• عضو انضم متأخر ممكن يتعدّل تقسيم مصاريف الشهر المفتوح
• الشهر المقفول مصاريفه مجمّدة لكن التسديدات عليه لسه بتتحسب
• فروق القروش من التقريب بتتوزع بالتساوي

لو لسه مش فاهم، ابعتلنا لقطة شاشة من الإبلاغ عن مشكلة.

مصروف سجّلته مش ظاهر

شوف:

• إنت في الشهر الصح؟ المصروف بيظهر في الشهر اللي اخترته (جرّب تبويب مغلقة كمان)
• إنت في الشقة الصح؟
• ممكن حد مسحه (شوف النشاط) وتقدر تسجّله تاني
• لو اتسجّل وإنت أوفلاين، اتأكد من الإنترنت وسحب للتحديث
• لو الشهر مقفول التطبيق مش بيسمح بالإضافة، بتتعرض لك إمكانية فتحه أو الإضافة للشهر الجاي

مش قادر أضيف مصروف: «الشهر مقفول»

الشهر المقفول مصاريفه متجمّدة. يا مسؤول الشقة يفتح الشهر (افتح الشهر تاني) وإنت تضيف، يا تضيف المصروف على الشهر الجاي. لو إنت مش مسؤول اطلب من المسؤول.

مش قادر أخرج من الشقة

لازم تكون متحاسب الأول: سدّد اللي عليك أو خلّي زمايلك يسجّلوا اللي ليك. ولو إنت المسؤول الوحيد خلّي حد تاني مسؤول قبل ما تخرج.

لينك الدعوة مش شغّال

«اللينك ده مبقاش شغّال»: اطلب من زميلك يبعتلك دعوة جديدة من دعوة أو ابعتله كود الشقة وانضم من انضم بكود أو رابط. اتأكد إنك مسجّل دخول، وإن التطبيق محدّث.

ملف PDF أو الإكسل مش بيفتح

• استنى لحد ما يخلّص «بنجهّز التقرير» وبعدين افتحه
• بعد الحفظ هتلاقيه في التنزيلات على الموبايل، افتحه بتطبيق PDF أو إكسل
• ثبّت قارئ PDF لو مفيش (جوجل درايف بيفتحه)
• جرّب ابعت على واتساب وافتحه من هناك
• لو فشل تجهيزه جرّب تاني بإنترنت ثابت، وإلا ابعتلنا الشكوى

التطبيق بطيء أو مفيش إنترنت

التطبيق محتاج إنترنت عشان البيانات تتحدّث. لو النت قطع بيعرض لك آخر نسخة محفوظة مع بانر «مفيش إنترنت» وبيحاول يتصل لوحده لما النت يرجع. التعديلات (إضافة مصروف أو تسديد) لازم إنترنت. لو بطيء: جرّب وايفاي تاني، اقفل وافتح التطبيق، وحدّثه لآخر نسخة.

التطبيق بيقفل لوحده

حدّث التطبيق لآخر نسخة، وأعد تشغيل الموبايل، وتأكد إن فيه مساحة فاضية. لو لسه، حسابي ثم مساعدة وتواصل ثم الإبلاغ عن مشكلة واكتب نوع الموبايل ونسخة أندرويد/آيفون ونسخة التطبيق (آخر صفحة المساعدة).

دفعت ومحدش أكّد أو المستلم قال «ماوصلش»

التسديد المستني تأكيد بيتحسب لحد ما المستلم يرد. لو قال «لسه ماوصلش» بيتلغي ويرجع دينك. لو فعلاً دفعت، ابعتله إيصال من ابعت إيصال على واتساب واتفقوا، وبعدها سجّل التسديد تاني أو خليه هو (أو المسؤول) يسجّله.

إزاي أتواصل مع الدعم؟

من حسابي ثم مساعدة وتواصل:

• واتساب: دردشة مباشرة
• إيميل: support@shoqqy.app
• الإبلاغ عن مشكلة: مع لقطة شاشة (بتشتغل حتى لو مش قادر تسجّل دخول)
• اقترح ميزة: بنقرا كل اقتراح

بنرد عادةً خلال ساعتين. اكتب في الرسالة إيه اللي حصل وإيه الشاشة، وكود الخطأ لو ظهر.

ظهرتلي «حصلت مشكلة» أو كود خطأ

ده مش غلطك. دوس حاول تاني، ولو فضل يتكرر دوس كلّم الدعم وابعتلنا كود الخطأ اللي بيظهر (مع الوقت). اتأكد برضه من الإنترنت ومن إن التطبيق محدّث.